'SUGATAN NA NPA LIDER, NAILIGTAS DUWANG ALDAW MATAPOS ANG ENGKWENTRO SA MASBATE'

Dai nagduwa-duwa ang awtoridad na tabangan ang sarong lider kan New People’s Army (NPA) na natagpuan nindang sugatan duwang aldaw matapos ang engkwentro sa pagitan kan rebeldeng grupo asin tropa kan gobyerno kaining naka-aguing Agosto 19, 2023 sa Sitio Madarag, Barangay Jagnaan, San Jacinto, Masbate.

Binisto ining si Ramon Bartolata, alyas “Jamon”, Commanding Officer kan Platoon 3, Komiteng Larangang Gerilya North, Sub-regional Committee 4, Bicol Regional Party Committee.

Siya kasamahan kan nasawi sa engkwentrong si Eddie Rosero alyas “Star”.
Istorya ni alyas “Jamon”, matapos ang engkwentro siya nagtago sa lugar asin inakalang babalikan siya kan saiyang mga kasamahan kundi natagpuan siya kan mga awtoridad.
Tulos man siyang tinawan nin paunang lunas kan mga sundalo asin idinara sa ospital para sa atensyong medikal.