Bikol NgunianGadan an sarong driver asin duwang kaibahan kaini matapos buminangga an minamaneho kaning truck na may kargang mga manok sa sarong harong harani sa Culasi River, San Jose Street, Goa, Camarines Sur kansuudmang, Hunyo 26, 2023.
Binisto an mga nasawi na sinda Junnie Nacion, 36-anyos, residente kan Pacol, Naga City, Jovito Paladan, kan Brgy. Gk Tagongtong, Goa, Camarines Sur asin saro pang indibidwal na dai pa natutukoy kung siisay sa ngunian.
Sa inisyal na impormasyon, nawaraan nin preno an driver kan truck saka ini buminangga sa nasabing harong asin dagos man na tuminagilid sa bangin.
Tulos man na nagresponde sa aksidente an EMS response team kan BFP R5 Goa asin MDRRMO Goa maging an pirang opisyal kan nasabing barangay para magsagibo nin rescue operation.
Uminabot nin halos pitong oras an rescue operations kan awtoridad dahil sa delikadong posisyon kan truck asin matinding pagkakaipit kan mga biktima.
Kan mailuwas an mga biktima tulos man ining dinara sa ospital kundi idineklara na ining dead on arrival.
Padagos ngunian an imbestigasyon kan awtoridad sa aksidente.
Litrato hali sa BFP R5 Goa.
