bikolngunianCAMARINES SUR—Nagtiripon an maniba-ibang sektor sa Camarines Sur kasubagong aga para mangapugan nin bagong liderato sa probinsya.
inamayuhan ini nin mga lider kan sektor nin kajovenan, paraoma, parasira, kababaihan, asin nin LGBTQ. Segun sainda, 40 taon nang sarong pamilya sana an may kontrol sa probinsya nin Camarines Sur. Sa haloy na panahong ini, mayong marhay na pagbabago, alagad mas naglala sana an sitwasyon sa probinsya.
Nagin emosyonal an convenor kan grup na si Dr. Philip Fortuno kan i-istorya an saiyang lola.
“Nahiling ko an sakit nin buhay kan sakuyang lola kaidto. Kaya ako naghigos tanganing makaahon kami sa hirap. Kaso pag nahihiling ko an satuyang probinsya, mayo pa man nanggad nin pagbabago. Pobre pa man guiraray. Mas naglala pa ngani.”
An Camarines Sur ngunyan iyo saro sa mga pinakapobre na probinsya sa Bicol at kaibahan sa pinakapobre na probinsya sa bilog na Pilipinas.
Tanganing ipahiling an saindang dedikasyon, nagpirma nin manifesto an Reforma Camsur:
KASUNDUAN NIN REFORMA SA PROBINSYA NIN CAMARINES SUR
Ako/Kami, bilang representante kan manlaen-laen na sektor kan mga namamanwaan sa probinsya nin camarines sur, nakikisumaro sa pangapodan na mapangyari an tunay na reporma sa paggogobyerno sa satong probinsya.
Ako/Kami, nangangako na magiging parte kan pagbuo (paghimo) nin mga opurtunidad sa trabaho asin suporta sa saradit na Negosyo nganing mapauswag an lokal na ekonomiya kan satong probinsya para mabawasan an kapagtiosan lalo na kan kasaraditan.
Ako/Kami, nangangako na mapasiguro an dekalidad na edukasyon para sa gabos, lalo na sa mga hobenes nganing sinda maging pusog asin kapakipakinabang pag abot kan panahon.
Ako/Kami, nangangako na suportahan an lokal na mga paraoma asin parasira itulod na maging prayoridad an sektor nin agrikultura sa paagi nin pagdiskobre nin manlaen laen na aprobadong paagi tanganing mapalangkaw an saindang ani asin mabawasan ang gastos kan pag oma sa satong probinsya.
Ako/Kami, nangangakong makikipagtabangan tanganing maibitaran an mga krimen, masigurong ligtas an lambang saro sa anuman na katibaadan asin magdanay an katrangkilohan sa satuyang probinsya.
Ako/Kami, nangangako na proteheran ang mga diretsos kan lambang saro urog na an mga daing kapasidad na proteheran ang saindang sadiri. Nangangako na gabaon ang gabos na sosyal na estruktura na nakadisenyo tanganing ang mga tios lalo pang mag tios.
Pangapudan nin Reforma Camsur sa mga tawo na dae matakot. Kun kita maghiro, hulog an nasa itaas!
Bikol Ngunian